Kryeministri i Kosovës, Avdullah Hoti i është kundërpërgjigjur presidentit serb, Aleksandar Vuçiq duke theksuar se nëse nuk do të ketë njohje reciproke, atëherë nuk do të ketë as marrëveshje me Serbinë.
Hoti përmes një postimi në Facebook, u shpreh se deklaratat e Vuçiç nuk i kontribuojnë dialogut mes dy vendeve.
“Dialogu ka rifilluar mbi parime të qarta për marrëveshje përfundimtare për normalizim të marrëdhënieve dhe njohje reciproke, dhe nuk do të ketë marrëveshje të pjesshme. Nëse nuk do të ketë njohje reciproke, atëherë nuk do të ketë as marrëveshje”, shkruan ndër të tjera kryeministri i Kosovës.
Ndryshe, presidenti i Serbisë, Aleksandar Vuçiq, ka thënë se deri në prill të vitit 2022, Serbia nuk do ta njohë pavarësinë e Kosovës.
Me këtë datë ai i është referuar vitit kur do të mbahen zgjedhjet presidenciale dhe parlamentare.
Dhe pas kësaj, siç ka deklaruar presidenti serb, njerëzit në Serbi do të jenë ata që do të vendosin.
Postimi i plotë i Hotit: Nuk ka marrëveshje me Serbinë pa njohje reciproke
Kosova mbetet e përkushtuar që të gjitha çështjet e hapura me Serbinë të përmbyllen përmes dialogut, i cili po zhvillohet në Bruksel, me ndërmjetësimin e BE-së.
Deklaratat se fqinji ynë verior nuk do ta njohë pavarësinë e Kosovës nuk i kontribuojnë dialogut. Dialogu ka rifilluar mbi parime të qarta për marrëveshje përfundimtare për normalizim të marrëdhënieve dhe njohje reciproke, dhe nuk do të ketë marrëveshje të pjesshme. Nëse nuk do të ketë njohje reciproke, atëherë nuk do të ketë as marrëveshje.
Kosova do të vazhdojë rrugën drejt Bashkimit Evropian.
