Kryeministri Avdullah Hoti sot ka takuar Sekretarin e Përgjithshëm të NATO’s, Jens Stoltenberg në selinë e Aleancës Veriatlantike në Bruksel. Në takimin e tyre as kryeministri Hoti e as Sekretari i Përgjithshëm i NATO’s nuk kanë përmendur incidentin në Karaçevë me xhandarmërinë serbe në fillim të muajit gusht.
Në këtë takim kryeministri Hoti ka falenderuar NATO’n për misionin e KFOR’it në Kosovë dhe ndihmën që i kanë dhënë Kosovës për menaxhimin e pandemisë Covid-19, raporton Gazeta Express.
“Kryeministri Hoti shprehu falënderimin e tij dhe të popullit të Kosovës për misionin e KFOR-it në Kosovë, duke theksuar se prania e NATO-s/KFOR-it, është e një rëndësie të veçantë për forcimin e paqes dhe të stabilitetit në këtë pjesë të Evropës Juglindore. Kryeministri Hoti e ka falënderuar sekretarin Stoltenberg edhe për ndihmën që u ka dhënë KFOR-i institucioneve të Republikës së Kosovës për menaxhimin e pandemisë COVID-19”, thuhet në njoftimin e Zyrës së kryeministrit.
Tutje kryeministri Hoti i ka shprehur përkushtimin e Kosovës për t’u bërë anëtare e NATO’s dhe ka ftuar Sekretarin Stoltenberg që ta vizitojë Kosovën.
“Duke e vlerësuar rolin e Aleancës Veriatlantike për paqen dhe stabilitetin ndërkombëtar, kryeministri Hoti theksoi përkushtimin e Kosovës për ndërtimin e një të ardhmeje euroatlantike dhe synimin që Kosova sa më parë të bëhet anëtare e NATO-s. Ndërsa, Sekretari Stoltenberg tha se NATO-ja do të ofrojë edhe më tej përkrahje të gjithanshme për Kosovën, për të siguruar një mjedis paqësor dhe një të ardhme të sigurt për të gjithë qytetarët e saj. Në fund të këtij takimi, kryeministri Hoti e ftoi Sekretarin Stoltenberg të vizitojë Kosovën, sa më parë që t’i jepet rasti”, thuhet në komunikatë.
Ndërkaq, misioni paqeruajtës i KFOR’it në Kosovë përmes një komunikate për shtyp ka njoftuar se në takimin mes kryeministrit Hoti dhe sekretarit Stoltenberg u diskutua për dialogun që u zhvillua në Bruksel të hënën dhe marrëveshjen e arritur në Uashington pa përmendur ngjarjen e xhandarmërisë serbe në Karaçevë.
Tutje, në këtë komunikatë thuhet se Sekretari i Përgjithshëm i NATO’s ka theksuar se aleanca veriatlantike është e përkushtuar për paqe në Ballkanin Perëndimor përmes 3500 trupave paqeruajtëse të KFOR’it të stacionuara në Kosovë.
