Zëvendës Ndihmës Sekretari amerikan i Shtetit, Matthew Palmer tha se SHBA-ja nuk do të imponojë zgjidhje për Beogradin dhe Prishtinën, pasi marrëveshja për normalizimin e marrëdhënieve duhet të jetë e iniciuar nga udhëheqësit e dy vendeve.
I pyetur nëse ka një afat për arritjen e një marrëveshje, ai është shprehur se “nuk beson se ka një afat” por që Shtetet e Bashkuara e konsiderojnë atë “një çështje urgjente”.
“Koha nuk është në anën tonë. Sa më gjatë të presim, aq më e vështirë do të jetë dhe të gjitha sfidat do të jenë më të komplikuara”, ka thënë Palmer në një intervistë për televizionin N1.
Palmer ka shtuar se Shtetet e Bashkuara mbështesin procesin e udhëhequr nga Bashkimi Evropian dhe i dërguari i tij Mirosllav Lajçak dhe se ai shpreson që të dy palët të vazhdojnë negociatat së shpejti.
I dërguari amerikan për Ballkanin Perëndimor gjithashtu ka komentuar deklaratën e liderit të lëvizjes Vetëvendosje, Albin Kurti, se dialogu nuk është ndër përparësitë e tij.
“Kam dëgjuar përparësitë që Kurti vuri në dukje – transparenca, qeverisja e mirë, lufta kundër korrupsionit, rregullimi i situatës në Kosovë – këto janë përparësitë tona, ne duam që e gjithë kjo të ndodhë në Kosovë,” tha ai.
(R.G/Faxweb.al)
