Kosova pret që marrëdhëniet e saj me SHBA-në të përmirësohen me zgjedhjen e Joe Bidenit, pasi dekada e mbështetjes kryesore amerikane u hodh në dyshim nën administratën “Trump”, ka thënë u.d e presidentes, Vjosa osmani, për “Financial Times”.
“Të gjithë e dinë që presidenti i zgjedhur Bideni nuk është vetëm një mik i Kosovës”, tha Vjosa Osmani në një intervistë për “Financial Times”, duke iu referuar mbështetjes së gjatë të Bidenit për ndërhyrjen dhe dialogun midis Serbisë dhe Kosovës. “Ai e di dhimbjen tonë shumë mirë”, ka thënë Osmani.
“Financial Times” më tej tregon se Osmani mori rolin e presidentit të përkohshëm në fillim të nëntorit pasi paraardhësi i saj, Hashim Thaçi, dha dorëheqjen për t’u përballur me akuza për krime lufte të ngritura nga një Gjykatë Speciale me bazë në Hagë.
Osmani i ka thënë “Financial Times” se Bideni njeh vuajtjet e popullit të Kosovës.”Joe Biden e di të vërtetën dhe e vërteta është shumë e dhimbshme dhe e qartë. Serbia e humbi Kosovën sepse abuzoi me parimin e sovranitetit dhe integritetit territorial për të vrarë njerëzit që jetuan në atë territor, për të kryer gjenocid, krime lufte dhe krime kundër njerëzimit. Ai e di të vërtetën dhe nuk do të përpiqet të ndryshojë të vërtetën”, ka thënë Osmani.
Ushtruesja e detyrës së presidentes i tha FT-së se duhet të shihet se cili është pozicioni i administratës së Bidenit në lidhje me marrëveshjen e 4 shtatorit për të bërë më tej hapa përpara, për të cilën Osmani ka qenë kundër.
“Ne nuk mund të shkojmë përpara. . . pa shikuar se cili është pozicioni i administratës së re në ato pika”, tha Osmani, duke iu referuar pikave të marrëveshjes për liqenin e Ujmanit dhe “Mini-Shengenin”.
Duke iu referuar dorëheqjes së Thaçit, Osmani tha se Kosova kishte treguar një “pjekuri institucionale” dhe “një vullnet të jashtëzakonshëm për të bashkëpunuar me drejtësinë”.
Osmani tha se nuk mund të ketë “asnjë ekuivalencë morale” midis krimeve të pretenduara të kryera nga disa individë shqiptarë dhe “aparatit shtetëror të Serbisë”. Ajo tha se përpjekjet e mëparshme gjyqësore për t’u kërkuar udhëheqësve ushtarakë dhe politikë serbë të japin llogari për luftërat në territorin e ish-Jugosllavisë nuk kishin zgjatur shumë.
