TIRANË-Tirana nuk ka arritur që të fitojë ndeshjen e parë si kampione e Superiores, teksa ka barazuar edhe ndaj Bylisit në shifrat 1-1. Gjithsesi kjo ndeshje nuk kishte vlerë për objektivat e të dyja ekipeve dhe Tirana ka bërë ceremoninë zyrtare të shpalljes si kampion i sezonit 2019-2020. Në fund të ndeshjes presidenti i skuadrës së Tiranës Refik Halili foli për Supersport. Numri një i klubit tregon se si Tirana arriti të fitonte titullin kampion ku ndoshta kthesa erdhi pikërisht në ndeshjen e derbit përballë Partizanit. Në fund Halili foli edhe për të ardhmen e Egbo-s.
“Shiko, unë mendoj se te klubi ka nevojë për psikolog. Unë kam bërë psikologun deri tani në skuadër. Kemi bërë edhe presione te lojtarët. Po ta shihni kemi kthyer sezonin që pas ndeshjes ndaj Partizanit në derbi. U kemi thënë që nëse humbisni edhe këtë ndeshje, për çfarë ju duam, për çfarë ju paguajmë? Po ju jap edhe një lajm që Egbo do të vazhdojë të jetë trajneri i Tiranës. Vetëm se do të ulemi dhe të flasim prapë me të. Do i shtojë edhe stafin, duhet të ketë edhe një ndihmës si zëvendës trajner. Do t’i shtoj stafin pasi duam të shkojmë në Europë dhe të lëmë gjurmë, jo të ikim si kalimtar”.
E.Ç (Dosja.al)
