SHKODËR- Këtë sezon skuadra e Vllaznisë ka pësuar ndryshime të mëdha, si në organikë ashtu dhe në staf drejtues. Që nga momenti kur sponsor i klubit erdhi Alban Xhaferri, skuadra ndryshoi pothuajse plotësisht ndërsa dhe stafi teknik u ndryshua.
Por tifozët, nuk mjaftohen vetëm me kaq, ata prej shumë vitesh kërkojnë që klubi të privatizohet e të mos jetë më në pronësi të bashkisë së qytetit. Kjo gjë do të realizohet shumë shpejt sipas lajmeve më të fundit në media.
Sipas “News 24”, ditën e premte Këshilli Bashkiak i Shkodrës do të votojë për privatizimin e klubit, kthimin në shoqëri aksionere dhe shumicën e aksioneve do i ketë Alban Xhaferri. Sipas udhëzimeve të institucioneve ndërkombëtare, një klub futbolli nuk mund të mbahet nga strukturat shtetërore ose pushteti lokal. Kështu, pas 8 vitesh situatash të vështira në klub, Vllaznia do të kthejë faqe dhe do kalojë në duart e një biznesi privat.
Xh.Z (Dosja.al)
