TORINO– Mërgim Vojvoda është transferimi më i ri i Torinos. Klubi italian pagoi 5 milionë euro nga Standard Liege për të marrë kartonin e mbrojtësit. Edhe pse tani ndihet krenar me veten, vite më parë futbollisti me origjinë kosovare as që e mendonte se do të luante në nivele të larta. Në një rrëfim për gazetën belge Le Soir, mbrojtësi ka folur për vështirësitë gjatë karrierës së tij, kur para katër vitesh mendoi të tërhiqej nga futbolli, pasi paguhej vetëm 600 euro.
“Kalimi te Torino ishte diçka që nuk e kisha menduar kurrë. Pak më shumë se katër vjet më parë, unë isha duke luajtur në divizionin e 4-t gjerman, në Carl Zeiss Jena, për 600 euro. Kam jetuar në një dhomë hoteli të zymtë, pa pasur para të mjaftueshme për të ngrënë. Për dy javë, pata një goditje të tmerrshme dëshpërimi. isha i humbur”.
Në fund të sezonit lojtari do të rikthehej te Standart Liege pasi në Gjermani ai ishte në formën e huazimit. Ekipi belg as nuk e kishte në plan t’a mbante futbollistin dhe kjo gjë e dëmtoi moralisht Vojvodën.
“Sapo mësova se do të kthehesha nga huazimi nuk dija se çfarë të bëja, pyesja veten nëse ishte më mirë të gjeja një punë tjetër dhe të braktisja futbollin,por vendosa të punoj fort dhe kjo bëri që drejtuesit të më mbanin. Kjo është hera e parë në karrierën time që jam krenar për veten. Sepse financiarisht, unë do të jem në gjendje të strehoj familjen time”, përfundon Vojvoda.
E.Ç (Dosja.al)
