DURRES – Nesër, me ndeshjet e javës së 10-të, nis edhe faza e dytë e kampionatit të 82-të të Superiores. Në orën 13:45 në Korçë, Teuta përballet me Skënderbeun në një takim, ku durrsakët konsiderohen favorite, duke synuar vazhdimësinë pas fitores ndaj Apolonisë.
Para kësaj ndeshjeje, në konferencën e zakonshme për shtyp, ka folur trajneri i Teutës, Edi Martini. Ai është shprehur i bindur, se skuadra e tij fiton nesër, megjithëse e di mirë cilësinë e një ekipi si Skënderbeu.
Fitorja në Fier? “Skuadra është më e qetë, megjithatë ishte një ndeshje që duhet ta kishim fituar me rezultat më të thellë, gabuam shumë para porte. Në pjesën e dytë nuk luajtëm mirë, i lëshuam terren Apolonisë. Pikët janë ato që të qetësojnë dhe them se ky trepikësh do të jetë një kthesë për të bërë mirë edhe në ndeshjet e ardhshme. Në çdo ndeshje ne hyjmë për fitore. E kemi të qartë detyrën e vetes sonë”.
Gjendja te Teuta? “Do të shkojmë në Korçë për të bërë një ndeshje, siç dimë ne të luajmë dhe do e fitojmë me patjetër. Mungesa e Aleksit i prish planet, megjithatë ne jemi skuadër me kontingjent mjaft të mirë. Pothuajse çdo pozicion është i dubluar, kështu që kemi lojtarë mjaft të mirë në dispozicion dhe deri nesër para ndeshjes do vendos për zëvendësuesin e tij”.
Mungesa e golave? “Besoj se gjithë ekipi do të zhbllokohet. Normalisht edhe sulmuesit do të lirohen dhe do të shënojnë gola. Kanë pasur një moment jo të mirë përpara portës, pavarësisht se kanë bërë ndeshje shumë të mira gjatë 90 minutave, por ashtu si portieri kur pëson një gol është në presion, ashtu janë edhe sulmuesit kur nuk shënojnë. Ne si ekip dhe si staf do i mbështesim me të gjitha forcat, që edhe ato të lirohen sepse janë lojtarë mjaft të mirë dhe me cilësi”.
Skënderbeu? “Çdo ndeshje është e vështirë dhe ka specifikën e saj. Ne e kemi parasysh shumë mirë se kush është Skënderbeu. Është ekip me djem të rinj dhe lojtarë që vrapojnë shumë. Ne si përballë tyre, Kukësit apo Tiranës, do të bëjmë lojën tonë dhe do tentojmë nga minuta e parë, te e fundit të fitojmë ndeshjen”, u shpreh Martini.
B.T (Dosja.al)
