Sipas INSTAT hyrjet e shtetasve shqiptarë dhe të huaj në territorin shqiptar gjatë muajit gusht kanë qenë 846.973.
Kjo shifër krahasuar me gushtin e vitit 2019 rezulton me një rënie 62.5 % që tregon se pandemia ka ndikuar ndjeshëm në sektorin e turizmit.
Ndërsa përgjatë tetë muajve të 2020, Kosova ka rënien më të ulët të hyrjeve të shtetasve në Shqipëri me 53.2 %, ndërsa rënien më të madhe e ka pasur Spanja me 89.9 %, krahasuar me të njëjtën periudhë të vitit të kaluar.
Kjo tregon se shtetasit kosovarë kanë qenë ata që kanë hyrë më së shumti në Shqipëri gjatë periudhës së pushimeve.
Sipas INSTAT, në gusht 2020, hynë në vendin tonë mbi 356 mijë shtetas nga Kosova, nga 575 mijë në total.
Ndërkohë që një vit më parë, nga Kosova, vetëm në gusht hynë mbi 781 mijë shtetas dhe që përbënin 51.1% të totalit të shtetasve që kishin hyrë në gusht 2019 në vendin tonë.
Turizmi është një ndër sektorët më të goditur nga pandemia e COVID-19 jo vetë në Shqipëri por edhe në vende të tjera ku shtetet më të dëmtuara janë Italia, Spanja, Greqia, Franca dhe Portugalia.
Sipas Organizatës për Bashkëpunim dhe Zhvillim Ekonomik rikthimi në nivelet e para krizës mund të kërkojë dy vjet ose më shumë nëse nuk do të ndodhin valë të tjera të pandemisë.
N.D./abcnews.al
