Infermieri i cili u ther me thikë në vendin e tij të punës në Klinikën e Urologjisë do t’i nënshtrohet intervenimit kirurgjik. Këtë e ka bërë të ditur Shërbimi Spitalor dhe Klinik Universitar i Kosovës përmes një njoftimi në faqen e tyre zyrtare.
Në njoftim thuhet se SHSKUK shpreh indinjatën e thellë për këtë rast dhe dënon ashpër sulmet ndaj mantelbardhëve. Therjen me thikë të infermierit e ka konfirmuar zëdhënësi i Policisë rajonale të Prishtinës, Bajram Krasniqi.
Ai ka bërë të ditur se rasti ka ndodhur sot rreth orës 14:35 dhe rasti po trajtohet nga njësitet policore.
“Sot, më 26.09.2020, në ora 14:35, policia është njoftuar për një rast ‘therje me thikë’ që ka ndodhur në QKUK, njësitet policore kanë dal në vend-ngjarje dhe janë duke e trajtuar rastin, për informata tjera u njoftojmë me kohë”, tha Krasniqi për Gazetën Express.
Njoftimi i plotë i SHSKUK: Shërbimi Spitalor dhe Klinik Universitar i Kosovës, është njoftuar se, sot në vendin e tij të punës është sulmuar me thikë, në Klinikën e Urologjisë, infermieri F.B.
Sulmi ka ndodhur, pas orës 14.00, derisa infermieri po kryente punën e tij. Infermieri pritet t’i nënshtrohet intervenimit kirurgjik. Për rastin është informuar edhe Policia e Kosovës.
ShSKUK shpreh indinjatën e thellë për këtë rast dhe dënon ashpër sulmet ndaj mantelbardhëve, të cilat janë të pa pranueshme.
Ofendimet, dhuna, e deri tek sulmet fizike, të tilla si ky i ditës së sotme ndaj mantelbardhëve ka pasur në vazhdimësi, andaj ju bëjmë thirrje të gjithë qytetarëve të respektojnë punën e mantelbardhëve, ndërsa sulmuesit e tillë të marrin pergjigjen e merituar nga organet kompetente.
Është koha e fundit që sulmet e tilla të ndalen njëherë dhe përgjithmonë ndaj punëtorëve shëndetësorë.
