TIRANE – Federata Shqiptare e Futbollit, kushtëzuar nga kushtet e vështira atmosferike dhe rreshjet e vazhdueshme të shiut, kanë marrë vendimin për të mbyllur dyert e stadiumit “Elbasan Arena”, për të ruajtur tapetin e gjelbërt të fushës.
Në këto kushte të penalizuar janë Partizani dhe Kukësi, dy skuadrat e Superiores, të cilat ndeshjet e tyre i kanë zhvilluar në atë impiant, që të ofron kushtet më të mira për t’u shprehur në fushën e blertë në Shqipëri.
Në fakt, skuadra e të kuqve të kryeqytetit, duke qenë se tri takimet e radhës u luan në transfertë, me gjasa u shpëton këtij “penaliteti”. Mungesën e “Elbasan Arenës” do ta ndjejë skuadra verilindore e Kukësit.
Mësohet se fillimisht, drejtuesit e FSHF-së, i kanë prozuar kuksianëve, që ndeshjen e javës së 18-të ta zhvillojë në stadiumin “Loni Papuçiu” të Fierit, meqë Apolonia luan në transfertë, çka nuk është pranuar nga drejtuesit e skuadrës verilindore.
Në këto kushte, alternative e vetme ka mbetur, stadiumin “Loro Boriçi” i Shkodrës. Kësisoj, të premten e 5 shkurtit, në orën 18:00, do të zhvillohet ndeshja Vllaznia-Laçi, ndërsa dy ditë më pas, të dielën e 7 shkurtit, në orën 13:35, po në stadiumin “Loro Boriçi”, do të luhet ndeshja Kukësi-Kastrioti.
B.T (Dosja.al)
