BEOGRAD – Tenisti numër një në botë, Novak Djokoviç është vlerësuar për gjestin e tij jashtë fushës, pasi dha një mësim të improvizuar tenisi për fëmijët në rrugët e Beogradit.
33-vjeçari serb, i cili u kthye në vendin e tij pasi humbi finalen e “Open French” ndaj spanjolit Rafael Nadal, u pa duke dhënë këshilla tenisi për një grup fëmijësh, ndërsa shëtiste qenin e tij në një rrugë në Beograd.
Fituesi 17 Grand Slame-ve, u fotografua duke udhëzuar një djalë, se si duhet të përdorte raketën e tenisit, ndërsa ishte i rrethuar nga fëmijë të tjerë, të cilët me bindje dëgjonin këshillat e kampionit.
Djali që praktikoi pak, nën tutelën e Djokoviçit, me krenari i tregoi aftësitë e tij yllit më të ndritshëm të Serbisë, i cili me shumë gjasa në fund të vitit, do të sigurojë për të gjashtën herë numrin një në renditjen botërore të tenisit.
“Leksioni” i improvizuar i Djokoviçit me fëmijët, u shpërnda gjerësisht në mediat sociale, ku tifozët përshëndetën idhullin e tyre për “mirësinë dhe humanizmin” e tij.
B.T (Dosja.al)
